Ильмира Нәгыймова «Чаллы ТВ» телеканалындагы «Ачыктан-ачык сөйләшү» тапшыруында элекке ире Руслан Кираметдиновның балаларны тәрбияләүдә бөтенләй диярлек катнашмавы хакында сөйләгән. Җырчы сүзләренчә, балаларга ата назы, ата игътибары җитми.
«Руслан балаларның тормышында да, минем тормышымда да юк. Кирәк тә түгел. Балаларны әбиләре алып китә. Аның белән бик яхшы аралашалар. Әбиләрен бик каты сагыналар, чөнки аларны кечкенәдән әбиләре үстерде. Шуңа мәхәббәт. Тик ата назы җитеп бетмидер.
Минем аңа (ред. – Русланга) бер язганым да булды. «Балаларга игътибар бир бераз. Алып кит, берәр кая алып бар атнага бер тапкыр булса да», – дидем. Яки, мәсәлән, Камилне бассейнга илтергә кирәк. Шунда алып барып кайтса да булыр иде.
Мин бит инде балаларга әти кирәк дип, аның белән кире кавыша алмыйм. Бу дөрес булмас иде. Ул – аларның аталары, бераз игътибар бирсә, аңа карата карашым да үзгәрер иде», – дип сөйләгән Ильмира.