Ильмира Нәгыймова Руслан Кираметдиновның администраторына: «Махсус эшлисез бу эшне»
Кичә Ильмира Нәгыймова элекке ире Руслан Кираметдиновны концертлары белән үзе артыннан ук йөрүдә гаепләп чыккан иде. «Даталарын һәрвакыт минем концертлардан соң ала, дип әйтәләр. Артистның артистка карата әшәкелеге инде бу, бездә шулай дип әйтәләр. Артымнан йөри, кыскасы», – дип язды Ильмира.
Әлеге стористан соң Руслан Кираметдиновны Башкортстандагы администраторы яклап чыккан.
Русланга концертларны 1 ел алдан алып куям. Тамашаларыңны 1 көн алдан алып барасың. Ә бу – әшәкелек түгелме? Шунысын да әйтәсем килә: бүген Русланга 210 билет сатылган чиста кассадан, Ильмирага – Пушкин картасы белән 47 билет. Уйландырырлык, – дип язып җибәргән ул Ильмирага.
Бик кызык, бу ханым минем концертка ничә билет сатылганлыкны каян белә икән? Күрәсең, көн саен кереп, санап утыра, башка эше беткән, – дип аптыраган Нәгыймова. – Минем әле билетлар кассада да һәм сайтта да сатыла. Барысын бергә кушып, Аллаһка шөкер, тулы заллар. Пушкин билетын гына санап утырмагыз.
Без инде өченче ел рәттән бер үк график буенча йөрибез. Бер көн түгел. Сез махсус эшлисез бу эшне. Аның өстенә түбәнсетәсез. Тынычланыгыз, – дип җавап кайтарган администраторга Ильмира.
