Җырчы Ильмира Нәгыймова Төркиядәге ялыннан матур видео-фотолар куйган һәм күңелендәгесен язылучылары белән бүлешкән.
«Күңелемә җыелган белән бүлешәсем килә. Мине күпләр күрәлмый, якыннар һәм яратканнар «сата», көнләшә. Ә мин бернигә карамастан бары тик алга барам. Сез белмәгән фактлар белән бүлешәсем килә. Мактанмыйм!
- Мин әти-әнине тәэмин итеп торам.
- Аларга йорт төзим.
- Минем ипотекам бар, мин аны, аннары түләрмен дип, калдырып киләм.
- Гашыйк булган идем, егетем белән 50/50 түләп ял иттем (моңа ничек карыйсыз?)
- Ир-атлардан беркайчан да ярдәм сорамадым.
- Элеккеге ирем 2 ел инде балаларга берничек тә ярдәм итми. Алар турында онытты, үзе «ярдәм итәм» дип мактанып йөри.
Балалар әниләренә генә кирәк, дигән нәтиҗәгә киләм. Әмма аларны җир белән тигезлиләр, янәсе, аерылышканнан соң, «вагоннары» белән беркемгә кирәкми. Бу хакта шундый хәлдә калган хатыннар яза да. Ә ир-атлар һәрвакыт трендта. Мин сезгә киресен исбатлаячакмын.
Минем үзем һәм миңа көч бирә торган туганнарым һәм балаларым бар. Минем кешеләр һәрвакыт янәшә, минеке миннән беркайчан да китмәячәк. Бергә без көчле. Әйдәгез, хатын-кызлар бердәмлеген алга этәрик. Ул бит ир-атларда бар, безнең кай җиребез ким?» – дип эчендәгесен бушаткан җырчы.
Комментарийларда җырчы белән күп кеше килешкән, аңа соклануларын, көчле булып калуын һәм бернигә карамастан алга баруын дәвам итүен теләгәннәр.