Ильмира Нәгыймова гастрольләрдә чакта аның балаларын кем карый?
Ильмира Нәгыймова белән Марат Яруллинның концертында очраштык.
«Миңа барыбер»
Концертлар сезоны ачылды. «Сольник»ларга әзерлек барамы?
Чаллыда, Әлмәттә һәм Казанда булачак концертларыма әзерләнәм. Билетлар да сатыла, Аллага шөкер.
Марат Яруллин белән бергә башкарган «Соңгы бию» җырыгыз танылды. Аны башкарачаксызмы?
Әйе, Марат концертыма чакырулы. Тагын бер дуэт булачак әле.
Җырчы Руслан Кираметдинов булачакмы соң?
Юк.
Син негативтан читләшә беләсеңме?
Иммунитет барлыкка килде инде хәзер. Миңа барыбер.
Ни белән тамашачыны шаккатырырга уйлыйсың?
Яңа образларымны, җырларымны тәкъдим итәчәкмен. Шаккатыру дип… Кирәкме соң ул? Моңым, сәләтем бар.
Композиторлыкка вакытың җитәме?
Вакыт җитеп бетми. Утырырга кирәк… Көй тиз арада тумый.
Казанга күчәргә теләгең бармы?
Теләк кенә түгел, максат һәм план – шул. Әмма хәзерге көннәрдә иртәгә ни буласын белмибез.
Балалар син гастрольләрдә булганда Чаллыда яшиме? «Няня»ң бардыр?
Бертуган сеңлем карый балаларны. Ул – аның төп эше кебек. Алар Чаллыда.