Илмир Ямалов мобилизацияләнүчеләр турында: «Тамаклары тук, күңелләре генә тыныч түгел...»

Алып баручы, музыкант Илмир Ямалов «ВКонтакте» челтәрендә мобилизацияләнгән җырчы, дусты Илсур Шәйдуллин турында даими язып тора. Чираттагы посты белән ул бик күп виртуаль дусларының сорауларына җавап биргән.

«Җиде көн...

«Нәрсәләр булды?», «Элемтәдәме?», «Илсур киттеме?» – менә шундый сораулар килә.

Татарстаннан мобилизацияләнгән егетләр әлегә «Казан Экспо»да туплану этабын үтәләр. Республика бирелгән сан егетләрне җыя.

Аннары егетләрнең бер айлык өйрәнүләре башлана. Шунда ук яшәп (юл аркылы гына чыгып), танклар полигонында. Алдагысы билгеле түгел… Ләкин бер ай – бу тирәдә генә.

Бүгенге көндә Илсур белән элемтәдә, рәхәтләнеп сөйләшеп була, гел видео аша аралашабыз. Янына барып, күрешеп сөйләшергә була.

«Ашау нык әйбәт һәм җитәрлек», – ди Илсур. Шулай ук рационда «хәләл» ризык та бар икән. Монысы өчен республика җитәкчелегенә аерым рәхмәт. Шартлар яхшы, зарланырлык түгел.

Җомга көнне, егетләрнең күңел-рухын күтәрү өчен, концерт та булган.

Әгәр дә сезнең танышларыгыз, ирләрегез, улларыгызны мобилизацияләгәннәр икән, 99,9% алар – «Казан-Экспо»да, һәм алар белән күрешеп була.

Егетләр көләч йөзле, зарланмыйлар, өсләренә бөтен нәрсә бар, тамаклары тук... Күңелләре генә тыныч түгел…» –дип яза Илмир.