ИлГәрәй юл фаҗигасендә һәлак булган Дамира Әшрәпованың үзенә язган соңгы смсын күрсәтте
«Татар-информ» Чаллыда «Әллүки – моңлы көй» ансамбле җитәкчесе Дамирә Әшрәпова юл-транспорт һәлакәтендә вафат булган дип язган иде. Дамирә ханым – шәһәрдә бик күп яшь талантларга үсәргә, артистларга концертлар оештырырга булышкан кеше. Ул җырчы ИлГәрәй белән дә бик дус булган. ИлГәрәй социаль челтәрләрдә аның үзенә язган соңгы смсын күрсәтте.
«Эх, Дамира апа, безнең бит әле эшлисе эшләребез бик күп иде. Соңгы сөйләшүдә «юлларың уң булсын, бик еракларга чыгып китәсез, исән-сау гына әйләнеп кайтыгыз» дип, безнең өчен бик борчылып калдың.
Урыннарың оҗмах түрләрендә булсын. 16 ноябрь көнне, юл һәлакәтенә очрап, Чаллы мәдәнияте тормышында зур эз калдырган Әшрапова Дамира Ядутовна китеп барды. Башкортстанга алып кайтып җирләнә.
Дамира апа миңа ватсаптан, яки шалтыратып, гел матур теләкләрен тели иде», – дип яза ИлГәрәй.
Дамира ханымның ИлГәрәйгә соңгы хаты:.
«И-и, балакай. Фәрештәләр канатларында гына күтәреп алып барсыннар. Хозыр Ильяс юлдаш булсын һәм саклап кына алып барсын барасы җирләрегезгә. Ай-һай ерак юл».
