«Игътибар! Менә бу кеше аркасында минем әтиемә еларга туры килде. Мин дә еладым», – дип, шактый куркытып башлап җибәргән бер тамашачысы җырчы ИлГәрәйгә атап язган хатын. Алгарак китеп укыганнан соң гына эшнең нидә икәнлеген аңлап була. Баксаң, өлкән яшьтәге абыйның күңеле ИлГәрәйнең җырлавыннан соң шулай тулган икән.
«Абый белән әтинең юбилеена бүләк ясап, ИлГәрәйдән килүен сорадык. Ул чыгышын «Балачагым» җырыннан башлады һәм әлеге җыр белән әтине елатты. Әти – бик сирәк, бары тик балаларының никахы яки оныклары тугач кына елый торган кеше. Ә монда җырның берничә юлы аны балачагына алып кайтты.
«Әти-әни кадере» җырын башкарганда, еларга миңа чират җитте. Миңа калса, әти-әниләр турындагы иң яхшы җырларның берседер ул.
ИлГәрәй, Айгөл, шундый җылы мөнәсәбәт, әтием һәм кунакларга бүләк иткән хис-кичерешләрегез өчен зур рәхмәт», – дип матур сүзләр язып калдырган ИлГәрәйгә бер фанаты сторисларында.