Җырчы ИлГәрәйдән премьера: аның «Кара кашларың» дигән җыры музыкаль мәйданчыкларга чыкты. Ул бу җырына авылда клип та төшереп килгән.
Клип җырчыны авылдагы дуслары колхоз эшендә ярдәм итәргә чакырудан башланып китә. Казан егете булуга карамастан, ИлГәрәй авылга кайтуга резин итек киеп куя да, җиң сызганып эшләргә фермага килә, әмма шунда ук аны машина таптата. Аннары ул атын да җигә, тракторын да йөртә, печәнен дә төйи, сыерларны да ашата, ә үзе шул арада мәхәббәт турында җыр суза.
Авылда яшәүче апа-абыйлар да клипта рәхәтләнеп төшкән, җырчы белән җырлаганнар да, биегәннәр дә.
«Кара, кара кашларың
Әйләнә башларым.
Кара, кара күзләрең,
Әйт сөю сүзләрең…»
«Рәмзия апа минем клипта рәхәтләнеп катнашты! Энем, мине бөтен Татарстанга танытасың инде, тарихка кереп калам бит, дип сөенде! Саулыкта яшәргә насыйп булсын, Рәмзия апа, киноларда да төшәрсез әле», – дип язган җырчы социаль челтәрдәге сәхифәсендә клипта катнашучы авыл апаеның берсе турында.