Җырчы Илдус Садыйков 7 ел элек гүр иясе булган әтисенең иң зур теләген чынга ашырган.
«Әтинең безне калдырып киткәненә 7 ел. Аның «әниегезгә диңгез күрсәтәм» дип биргән вәгъдәсе бар иде. Әти, нәзереңне үтәдем, тыныч йокла. Урының оҗмахта булсын, амин», – дигән ул.
«Әни, купальникларыңны җыя башла», – дип, җырчы әнисенә беренче тапкыр диңгезгә очачаклары турында бәрәңге алган вакытта, бакчада хәбәр итә. Нурсинә апа башта улына ышанмый. «Кит, Илдус», – ди ул авыл апаларына хас беркатлылык белән.
Илдус Садыйков әлеге видеоны үз сәхифәсенә әнисенә диңгез күрсәтеп кайтканнан соң куйган. Аның янында Нурсинә апа үзе дә комментарий калдырган. «Аллаһның рәхмәте яусын, улым. Сүз белән генә әйтеп бетерерлек түгел, искиткеч матур ял иттердең, исән-сау гына булыгыз, Раббым», – дигән хисләнгән әни кеше.
Калганнар: «Мин ник елыйм? Бу бит күңелгә үтә торган видео...», «Әниләрнең кадерен менә шулай белергә кирәк, алар безне үстергәннәр», «Барыбызның да уллары шундый булса иде», – дигән сүзләр язып калдырганнар.