Илдар Хәкимов – Салаватка: «Ләйсән апа белән җенси мөнәсәбәтегез дә кызыксындырмый»
Искәртеп үтик, Салават Фәтхетдинов «Татар-информ» мәгълүмат агентлыгында Илһам Шакиров исемендәге премиягә багышланган матбугат очрашуында: «Илдар Хәкимовны начар җырчы дип әйтмәс идем. Филүс кебек үк шәп җырчы. Кияүгә чыгып кына харап булды.Ул – минем студент, мин аны үзем эзләп таптым. Дөресрәге, Альфред табып: «Тыңлап кара әле, Салават Зәкиевич», - дип алып килде. Дөрес, матур, моңлы җырлый. Ләкин нишлисең инде. Гаиләдә бит хуҗа бер генә була. Кызганам, дияргә ярамый, ләкин «обидно, слушай», – дигән иде.
Илдар Хәкимов Салават Фәтхетдиновка җавап язган.
«Салават абый мине югалткан.
«Абый, абый! Салават абый!» диләр, шунысы күңелсез» дигән җыр искә төшә монда.
Әйе, Салават абый, Гүзәл белән сезнең 10 концертта җырладык бит инде ул сезонда. Шунда таныштык, Сезнең «Яратып кал җирдә, соңлама» дигән җыр астында сәхнәдә бергә басып тордык.
Ачуланма инде, Салават абый. Синдә бер ай җырлап йөргәннән соң, Россия буйлап үзебезнең концертлар белән йөри башладык.
Аннары Сез мине эзләмәдегез дә, тапмадыгыз да. Уфада мин Сезнең концертка килгән идем. Якташым Альфред абый Сезнең белән таныштырды. Сезнең фикерегезне укыдым да, минәйтәм: «Кирәк бит, шәхсән Салават Зәкиевич үзе минем язмышым турында борчыла!».
Абый, Аллаһка шөкер, әкрен генә без, балалар үсеп килә. 20 нче юбилей сезонына әзерләнәбез. Сезне дә, хөрмәт итеп, Кремль концертына зур кунак буларак чакырган идек. Ә Сез... Менә мин, нишләптер, Сезнең иҗатыгыз өчен борчылмыйм. Ләйсән апа белән җенси мөнәсәбәтегез дә кызыксындырмый. Кем кияүгә чыккан, кем өйләнгән – барыбер. Минем анда эшем юк.
Абый, абый...» – дип язган аккаунтында Илдар Хәкимов.
«Илдар җырлый да белә, гаиләсе өчен үлеп тора», «Бигрәк зирәк җавап булган бу», «Сез – бик акыллы һәм сокландыргыч гаилә. Шундый мәрхәмәтле булып калыгыз. Кешеләр сүзенә карамыйча, хатыныгызны хөрмәтләп, сөеп яшәгез», «Ачуланма, Илдар балам! Мин шулай уйлыйм: Гүзәл сине «каплады». Әмма сиңа шулай ошый икән, монда бернинди дә проблема юк. Гаиләгезгә бәхет телим», – дип язган халык.
