«Икесе дә бер хатынга гашыйк» - Татарстанда бер ир-атның аркасына отвертка кадаганнар
Тукай һәм Минзәлә районында яшәүче ир-атлар Чаллыда очраклы гына очрашкан.
Чаллыда 14 августта төнге уникеләр тирәсендә ике ир-ат бер хатын өчен талаша. Шуннан соң 32 яшьлек ир-атның аркасына көндәше отвертка кадый. Бу турыда «Челнинские известия» хәбәр итте.
Полиция хезмәткәрләре ачыклаганча, бер хатынга гашыйк булган ике ир-ат очраклы рәвештә генә очраша. Берсе Минзәлә районыннан килгән 34 яшьлек ир-ат, икенчесе Тукай районыннан килгән 32 яшьлек ир-ат була. Алар башта бәхәсләшә башлый.
Минзәләдән килгән ир-ат көндәшенең аркасына отвертка белән кадый. Тукай районыннан килгән ир-атның үпкәсе яралана, аны ашыгыч ярдәм хастаханәсенә илтәләр.
34 яшьлек ир-атны полициягә алып китәләр. Җинаять эше ачылган, диелә хәбәрдә.