Ике яшьлек бала, магнит конструкторы детальләрен йотып, могҗиза белән исән калган

Рентген рәсемен күргәч, врачлар аптырашта калган: баланың эчендә 60 магнит шәйләнгән. Бу хәл Комсомольск-на-Амуре шәһәрендә булган.

Кызның әти-әнисе баланы хирургия бүлегенә үзләре китергән, чөнки сабый корсагындагы түзә алмаслык авыртуга зарланган. Табиблар балага рентген ясагач, аның эчендә 60 түгәрәк магнит күренгән.

Табиблар әйтүенчә, әгәр очраклы рәвештә берничә магнит йотсаң, алар ашказаны-эчәк трактында укмашырга һәм эчәклекне эчтән кысарга мөмкин. Бу – некрозга, перфорациягә, эчәклекнең тыгылуына, эчәклекнең борылуына китерә ала, дип шәрехләгән 7 нче шәһәр хастаханәсенең балалар хирургия бүлеге мөдире Андрей Костенко.

Кечкенә пациент 2 сәгать диярлек хирургия өстәлендә уздырган. Катлаулы операция вакытында табиблар муенсага охшаган магнитлар чыгара алган.

Бала хәзер исән-сау.