Ике яшьлек баланың башына зур кайчы кадалып калган
Сабый кулына кайчыны тоткан килеш урындыктан егылып төшкән.
Кытайдагы Фуян шәһәрендә ике яшьлек баланың башына зур кайчы кадалган. Бәхеткә, бала исән калган. Бу турыда The Sun басмасына сылтама белән «Лента.ру» хәбәр итте.
Туганнары аерым бүлмәдә телевизор карап утырганда, сабый урындык ала һәм шкаф тартмаларын актара башлый. Шунда ул тегүче куллана торган зур кайчы табып ала. Бала кайчыны кулына ала һәм урындыктан егылып төшә. Кайчы баланың башына кадала.
Баланы тиз арада хастаханәгә илтәләр. Бу вакытта кайчы баланың башында кадалган килеш торып тора. Нейрохирург сүзләренчә, кайчының пычагы баланың башына 15 миллиметр чамасы тирәнлеккә кереп кадалган.
«Малай бик бәхетле булып чыкты. Кайчы аның баш сөяген тишеп кергән, баш миенең тышчасын тишкән, баш мие тукымаларына зыян килмәгән», — дип сөйләгән табиб.
Сабыйның башындагы кайчыны алу өчен ике сәгать операция ясаганнар. Киләчәктә бала тулысынча сәламәтләнер, дип өметләнәләр.