Әгәр ике дөнья бәхетенә ирешергә теләсәң, гыйлем ал! Коръәндә: «Аллаһы арагыздан иман китергәннәрне һәм гыйлем бирелгән кешеләрне дәрәҗә ягыннан күтәрер», – дип әйтелгән. («Әл-Мүҗәдәлә / Бәхәсләшү»)
Әлбәттә, ышанычлы уку йортында һәм белгән укытучылардан гыйлем алганда үтәлергә тиешле булган тәртипләр бар:⠀
Иң беренче чиратта ният дөрес булырга тиеш. Кеше гыйлемне башкалар янында үзен өстен тотар өчен түгел, ә Аллаһы ризалыгы һәм кешеләргә ярдәм итәр өчен ала.⠀
Гыйлем алу – зур хезмәт. Әгәр гыйлем алырга тотынган булсагыз, җиренә җиткергәнче тырышу кирәк. Расүлебез: «Гыйлем аңа омтылу нәтиҗәсендә туплана», – дип әйткән (имам Әт-Тәбарани).⠀
Гыйлем – кеше өчен зур җаваплылык. Гыйлемгә ия булган кеше моны аңларга тиеш, чөнки күпләр аны үзләренә үрнәк итеп алачак. «Менә ул да шулай эшли, димәк, бу – рөхсәт ителгән гамәл», – дип фикер йөртәчәк. Боларга җитди карау кирәк.
«Хозур дин турында» телеграмм-каналыннан
