Россиядә халыкны алдауның яңа схемасы барлыкка килгән. Мошенниклар ялган «Электрон көндәлекләр» аша, телефон номерын яңарту сылтавы белән, конфиденциаль мәгълүматка керү мөмкинлеген урлый. Бу хакта «ВЕСТИ.ру» хәбәр итә.
Хокук саклаучылар хәбәр иткәнчә, мошенниклар, шалтыратып яисә мессенджерларда язып, үзләрен уку йорты хезмәткәре яки техник ярдәм хезмәтеннән дип таныштыра.
Ата-аналарга телефон номерын расларга, мәгълүматларны яңартырга яки, электрон көндәлекнең дөрес эшләве өчен, хисап язмасын активлаштырырга тәкъдим итәләр.
Алга таба мошенниклар SMS аша килгән кодны хәбәр итүне сорый, яки фишинг ресурсына җибәрә. Билгеләп үтелгәнчә, ресурсларның мондый төре системага бердәм идентификация һәм аутентификация системасы (ЕИА) аша гына кереп булуын хәбәр итә, әмма аутентификация өчен ясалган бит – ялган.
Мәгълүматларга керү мөмкинлеген алганнан соң, мошенниклар «Дәүләт хезмәтләре» порталындагы аккаунтларга, шулай ук онлайн-банкларга һәм башка сервисларга керә ала.
Эчке эшләр министрлыгында искәртүләренчә, уку йортлары рәсми вәкилләре беркайчан да SMS, пароль яки паспорт мәгълүматларын телефон аша сорамый. Электрон көндәлек белән бәйле теләсә нинди операция мәктәпләрнең рәсми платформалары яки «Дәүләт хезмәтләре» порталы аша чит кешеләрне җәлеп итмичә башкарыла. Шикле кешеләр шалтыратканда, кичекмәстән сөйләшүне туктатырга һәм, мәгълүматны тикшерү өчен, мөстәкыйль рәвештә уку йорты белән элемтәгә керергә кирәк, диелә хәбәрдә.