Идрис Кәлимуллин Ришат Фазлыйәхмәтов эзеннән бара: мунчада шәрә килеш төшкән

Башкортстанның халык, Татарстанның атказанган артисты Идрис Кәлимуллинның җырлый-җырлый күчмә мунча кергәнен видеога төшергәннәр. Мунчасының ишеген зур итеп ачып куйган, күрсәтергә ярамаган җирләрен себерке белән генә капланган артист тормыш фәлсәфәсе турында сөйли. «Менә шулай табигать кочагында, күчмә мунчада ял итеп, җәй көннәрен файдалы итеп үткәрәбез. Табигать белән гармониядә булганда гына безнең күңелләребез дәртле, тәннәребез сау була, җаннарыбызда матурлык туа», — ди.

«Мунчасын алып киткәч, урыны нинди хәлдә кала икән соң? Табигатькә зыян китермиме икән бу мунча?»,

«Шушы будканы сөйрәп йөрисеңме? Көн буе ял ит табигатьтә, соңыннан кайтып, рәхәтләнеп өеңдә мунча кер», — дип яза аңа берничә инстачы.

Калганнары җырчыга җиңел пар теләгән.

Ришат Фазлыйәхмәтовның шәрә килеш мунчада фотога төшүен халык кабул итмәгән иде. Идрис Кәлимуллинга бик бәйләнмәгәннәр.