«Соңгы сулышына кадәр» (Алмаз Хәмзин)

«Чаян» журналы Алмаз Хәмзиннән актуаль шигырьләр тәкъдим итә.

Сәламәт килеш стаж җыйгач,

Ялга чыкмак булды сыер.

Җибәрмәделәр, әйттеләр:

«Пенсиясез эшләп син йөр!

Яшең зур, ләкин дәртең бар,

Мөмкинсең бозау табарга!

Имчәгең дә — сөбханалла!..

Саусыннар исән чагыңда!»

Мескенгә дару каптырып,

Өч ел иртә-кич саудылар.

Хәлдән таеп аугач, аны 

Үләт базына салдылар…

Ышаныгыз: комсыз карын,

Безне салыр гүргә кырын.

(Интернеттагы шигырьдән тәрҗемә).


Җиңәрбез!


Авыр булды...

Революция ясадык унҗидедә,

Буржуйларны кудык барысын да.

Авыр булды...

Яңа ил төзедек, индустрияләдек,

Сүктек Алласын һәм мулласын да.

Авыр булды...

Фашистларны җиңдек без кырык биштә,

Кырды алар күкрәк баласын да.

Авыр булды...

Берәү килде генсек, икәү, өчәү, дүртәү –

Төзи яздык бит коммунизм да!

Авыр булды...

Таркалды Ыс, Ыс, Ыс, Ыр, калдык без кысыр,

Вак халыклар Ры-СыФы-Сырында.

Таландык кабаттан буржуйдан, карактан,

Олигархлы дәүләт статусында.

Бик, бик авыр, әлбәттә!.. «Ур-ра» курсында –

Җиңәрбез коронавирусын да,

Посып утырсак өйдә, «Чаян»ны укып,

Һәрберебез үз квартирасында!