Һиндстан тарихи Бхарат исемен кире кайтарырга мөмкин, дип хәбәр итә The Economic Times газетасы.
Ил хөкүмәте 18-22 сентябрьдә Һиндстан парламентының махсус сессиясе вакытында тиешле резолюция кертергә планлаштыра.
Моннан тыш, X дигән социаль челтәрдә (элекке Twitter) Һинд милли конгрессы җитәкчесе Джайрам Рамеш хәбәр иткәнчә, «Егермелек төркеме» (G20) илләре вәкилләренең кичке ашына рәсми чакырулар «Һиндстан президенты» исеменнән түгел, ә «Бхарат президенты» исеменнән җибәрелгән.
«Хәзер Конституциянең 1НЧЕ маддәсе: «Һиндстан булган Бхарат Штатлар союзы булырга тиеш», – дигән Рамеш.
Бхарат – Һиндстанның һинд телендәге тарихи исеме. Һиндстан дигән исемне илгә төньяк-көнбатыштагы европалылар илнең төньягында ага торган Инд елгасы булганга биргән. Ә һиндстанлылар үзләре аны Синдху дип атый.
9-10 сентябрьдә Нью-Делида Һиндстан рәислегендә «Егермелек төркеме» (G20) илләре лидерлары саммиты узачак. «Ведомости» сайты хәбәр итүенчә, быел катнашучы илләр беренче тапкыр уртак документны килештерә алмаска мөмкин, чөнки алар арасында, аерым алганда, дөнья сәясәте мәсьәләләренә бәйле каршылыклар бар.