Хатынын үлде дип уйлаган ир борчылудан үзе вафат булган
Хатыны мунчадан озак чыкмый торгач, ире аны үлде дип уйлаган.
Самара өлкәсенең Подвалье авылында бер ир-ат вафат булган. Ул хатыны үлә дип уйлаган, шуңа борчылган һәм үзе дә үлеп киткән. Бу турыда КТВ-Луч сайты хәбәр итте.
Авыл халкы сүзләренчә, 54 яшьлек хатынга ашыгыч ярдәм чакыралар. Ул мунчага кереп киткән һәм озак чыкмый торган булган. Борчуга калган ире мунча ишеген ачып карый. Ул хатынының аңсыз ятуын күреп ала. Ир бик каты борчыла, ул хатыны ис тиеп үлгән дип уйлый.
Ир ашыгыч ярдәмгә шалтырата, хатынының хәле китүен әйтергә өлгерә. Аннары егыла да үлеп китә.
Ир-ат моңа кадәр инфаркт кичергән булган.
Ашыгыч ярдәм килә, хатынга табиблар ярдәм итә, ул исән кала. Ә ирен коткара алмыйлар.
«Безнең кырык еллык тәҗрибәдә бу беренче шундый очрак», — дип сөйләгән сайтның экстрен хезмәтләрдәге чыганагы.