«Хатынның күзен биш сәгать каплап утырам» — Азат Фазлыев йөкле Алсуның теләген үти
Җырчы гаилә Мальдив утрауларында ял итә.
Алсу һәм Азат Фазлыевлар уллары белән Мальдив утрауларында ял итә. Иҗади гаилә ял итү урынына 9 сәгать очкан.
Видеода Алсу Казандагы фатирларында тәрәзә төбендә кәефсезләнеп утыра. «Менә кара әле бу һава торышына… Кичә салкын инде, бүген яңгыр ява, бозлавык, иртәгә — буран, берсекөнгә кар явачак», - ди Алсу. Ә Азат исә тынычландыра һәм куллары белән Алсуның күзләрен каплый, шул арада алар чын-чынлап Мальдив утравында океан ярында басып тора.
«Йөкле хатын-кызның бар теләге дә чынга ашырга тиеш!» — дип тә язган Азат.
Инстачыларның да тиз генә Мальдив утравына килеп чыгасы килгән бугай.
«Хатынның күзен 5 сәгать каплап утырам инде, үзгәреш юк! Аннары нишләргә ул?» — дип сораган берәү.
«Самолетка утырырга», «Хатының йөклеме соң?», «Иң элек алар эшләгән компаниягә эшкә керергә кирәк», дип киңәшләр биргәннәр бу ир-атка.
«Йөкле булу мөһимме ул, ә? Анысын иртәгә генә әйтә алам. Мунча яктым, күзен бәйләп ләүкәгә утырттым», — дип шаяртуын дәвам иткән әлеге ир-ат.
Иҗади гаиләгә виртуаль дуслары күңелле ял итүләрен теләгән һәм аларның тырышлыкларына соклануларын белдергәннәр.