Хастаханә табибы COVID-19 белән авыручылар ята торган реанимациядә видео төшергән
Бүлектә бик авыр хәлдә авырып ятучы кешеләр күп.
Мәскәүдәге 15нче номерлы хастаханәнең баш табибы Валерий Вечорко авырулар белән тулы палаталарны видеога төшергән. Ул коронавирус йоктырып, авыр хәлдә хастаханәгә салынган кешеләр саны артуын әйтә. Табиб авыручыларның яше кырык яшькә кадәр булуына басым ясый. Вечорко реанимациядәге бүлмәне телефон камерасына төшергән кадрларны «Вести» каналы күрсәтте.
«Соңгы арада безнең реанимация бүлегенә яшь кешеләрне күп китерәләр. Аларның хәле бик катлаулы була, аларны үпкәләрне ясалма җилләтү аппаратына тоташтыру таләп ителә. Реанимацияләр бик тыгыз режимда эшли, пациентлар күп, көн саен аларның саны арта бара, аеруча кырык яшькә кадәргеләр күп килә. Алар килгәндә үк бик авыр хәлдә була», — ди доктор.
Кадрларда COVID-19 белән авыручылар белән тулы реанимация бүлеге сурәтләнә.
Вечорко барлык кешеләрне дә үз-үзеңне изоляцияләү режимын сакларга чакыра, моның пандемияне туктату өчен бердәнбер ысул булуын әйтә. Әгәр авыру билгеләрен сизеп алсагыз, кичекмәстән табиб чакырырга һәм әйләнә-тирәдәге кешеләр белән контактларны туктатырга кирәк, ди ул.