Һәлак булган «Алга» хәрбиенең әнисе: «Бүлмәгә керер дә, җилкәмнән кочаклап алыр сыман»
«Ул шат күңелле егет иде, барысын да тыңлый, әмма үзенчә эшли иде», – дип искә ала Әнис Галиуллинны туганнары һәм якыннары. Быел Җиңү көнендә ефрейтор, «Алга» батальоны хәрбие, үлгәннән соң, Батырлык ордены белән бүләкләнде. Аның турындагы истәлекләре белән туганнары уртаклаша.
«Бүлмәгә керер дә, җилкәмнән кочаклап алыр сыман»
Һәлак булган солдатның әнисе көнгә берничә тапкыр улының Батырлык ордены бүләген алып карый. Бу бүлмәдәге күп нәрсә Әнис Галиуллинны хәтерләтә – аның фотолары, грамоталары һәм спорт турнирлары вакытында алган медальләре. Бу хакта «Татар-информ»да Эльза Кузнецова яза.
«Һаман да Әниснең исән булмавына ышанмыйм, бүлмәгә кереп, җилкәмнән кочаклап алыр сыман», – дип сөйли «Мамадыш-информ»га геройның әнисе Татьяна Саранина.
Татьяна Саранина: «Һаман да Әниснең исән булмавына ышанмыйм, бүлмәгә керер дә, җилкәмнән кочаклап алыр сыман».
Фото: © видеодан скриншот
Хатын 5 баласын берүзе үстергән. Аның ире балалары кечкенә чакта вафат булган. Бүген Татьяна аларның балачакларын, ниндидер эш кушканда «Ни өчен?» дип мең сорау бирүләрен искә төшерә.
«Балалар, гадәттәгечә: «Әни, нигә, нигә, нигә?» Мин аларга: «Шулай кирәк», – дим. Менә бу юлы да Әнис икенче тапкыр махсус операция зонасына китте. Китәр алдыннан миңа шалтыратып, кабат шунда баруын әйтте. Мин аңардан сорыйм: «Ни өчен?» Ә ул миңа: «Әни, шулай кирәк» диде», – дип искә ала Татьяна Саранина. Әнис әнисенә тагын бер тапкыр шалтыратырга өлгерә, ә аннары шалтыратулар туктала.
Һәлак булган солдатның әнисе көнгә берничә тапкыр улының Батырлык ордены бүләген алып карый.
Фото: © видеодан скриншот
«Кызганыч, хәзер без дүртәү калдык»
Әнис Галиуллин 1992 елның 21 маенда туган. 2010 елда Мамадыш районы Омар авылында мәктәпне тәмамлаган. Махсус операциягә 2022 елның язында китә, ә 25 августта «Алга» батальонына мотоукчы наводчик-оператор вазифасына керә.
Өйдә аны хатыны, әнисе, 2 абыйсы һәм 2 апасы көтеп кала. Әнис Галиуллин 30 яшендә һәлак була.
Гаскәр часте командиры вазифаларын вакытлыча башкаручы хәбәр иткәнчә, ефрейтор Әнис Галиуллин 2022 елның 30 сентябрендә һәлак була. Хушлашу туган авылында 9 октябрьдә була.
«Әнис, әлбәттә, яхшы егет иде. Без дус булдык. Гаиләдә бишәү үстек. Һәрвакыт бергә булдык, хәзер дә бергә. Кызганыч, хәзер без дүртәү калдык», – ди сеңлесе Елена Асылмарданова.
Ефрейтор Әнис Галиуллин 2022 елның 30 сентябрендә хәрби бурычын үтәгәндә һәлак була. Хушлашу туган авылында 9 октябрьдә була.
Фото: © mamadysh-rt.ru
«Һәрвакыт үз сүзендә торды»
Быелның февралендә ул укыган уку йорты диварына Әнис Галиуллин истәлегенә мемориаль такта куелды. Чарага якыннары, дуслары, укытучылары һәм район җитәкчелеге килде. Мемориаль такта ачылганнан соң мәктәптә «Батырлык дәресе» узды. Биредә укучыларга хәрбинең балачагы һәм мәктәп тормышы турында сөйләделәр.
Сыйныф җитәкчесе Резеда Касыймова сүзләренчә, Әнис бик актив егет булган һәм хәтта армспорт буенча республика чемпионы булган.
«Ул мәктәптәге һәм райондагы барлык чараларда катнашты. Спорт белән шөгыльләнергә ярата иде. Математика буенча да көчле укучы иде. Һәрвакыт үз сүзендә торды», – дип, истәлекләре белән уртаклашты педагог.
Мамадышлылар Батырлык ордены алган һәлак булган якташларының һәрберсенең исемнәрен беләләр, дип яза газета. Алар арасында Олег Сорокин, Илназ Хәбибрахманов, Инсаф Нуруллин, Николай Пичугин, Азат Латыйпов, Әнис Галиуллин бар. Үсеп килүче буын Мамадыш районының һәр мәктәбендә «Мөһим сөйләшү» дәресләрендә аларның батырлыкларын һәм тормыш юлларын өйрәнәчәк.
Укучылар белән очрашуда район башлыгы Анатолий Иванов «яшь буынны патриотик тәрбияләү махсус операциядә батырларча һәлак булган якташлары мисалында алып барылырга тиешлеген» әйткән.