Хөрмәле салат өчен: 250 грамм хөрмә, 300 грамм тавык ите, пекин кәбестәсе, салат, 1 кызыл суган, әстерхан чикләвеге, зәйтүн яки үсемлек мае, тоз, борыч, шикәр комы, анар соусы.
Хөрмәне юка, әмма зур кисәкләргә турарга, тавык итен пешерергә яки зур кисәкләргә турап кыздырырга, кәбестәне һәм салат яфракларын эрерәк итеп кул белән бүлгәләргә, уртача зурлыктагы суганны боҗралап турарга, чикләвекне вакларга кирәк.
Салатны аерым тәлинкәләргә ясап, ашаганда гына болгатсагыз яхшы булачак. Әзер салат өстенә тоз-борыч, шикәр комы сибәргә, анар соусы салырга була.
Салат тәмле булсын өчен тыгыз, баллы хөрмә сайлап алырга кирәк.
