Хәрби колоннага йөк машинасы бәрелгәч, дүрт кеше үлгән, дистәләрчә кеше имгәнгән
36 яшьлек ир-ат йөк машинасы белән идарәсен югалткан һәм дүрт автобусны бәрдергән, аны тоткарлаганнар.
11 гыйнварда көндез Мәскәү өлкәсендә хәрбиләр утырган дүрт автобус һәм йөк машинасы бәрелешкән. Якынча белешмә буенча, дүрт кеше һәлак булган, алты кеше имгәнгән. Соңрак ачыкланганча, кырыклап кеше зыян күргән. Бу турыда экстрен хезмәтләргә сылтама белән РИА Новости хәбәр итте.
Авария Красногорскида Новорижский шоссесында булган. «Балтия» М-9 федераль трассасында Глухово авылына таба борылганда хәрби автобуслар колоннасына йөк машинасы килеп бәрелгән. Йөк машинасын йөртүче кеше идарәсен югалткан.
«Курсантлар утырган дүрт-биш автобус килә иде. Аларга үзбушаткыч бәрелде. Асфальтта мәетләр ята иде», — дип сөйләгән шаһитлар.
Оборона министрлыгы дүрт хәрбинең һәлак булуын раслады, диелә бу хәбәрдә.
Кичке якта «Интерфакс» агентлыгы иллеләп кеше зыян күрүен язды. Алар хәрби хезмәткәрләр. «Интерфакс» белешмәсе буенча, автобусларда срочник-солдатлар һәм дүрт офицер була. 24 кешене хастаханәгә салганнар.
«Вести» каналы хәбәр иткәнчә, йөк машинасы белән Владимир өлкәсендә яшәүче 36 яшьлек кеше идарә иткән. Аны тоткарлаганнар. Авария вакытында бу кешенең аек булуы билгеле.