Хәмдүнә Тимергалиева: “Марат Шәйбәков – минем кияү”

Күптән түгел үктән ТМТВ бәйрәмендә “Бәхетле” төркеме солистлары үзләренең чыгышларын көткән арада Хәмдүнә апа Тимергалиева белән аралашып алганнар. Әлеге аралашуны алар Instagram челтәре “сториз”ына урнаштырганнар иде. Әлеге видеотасмада Хәмдүнә апа Марат Шәйбәковны үзенең кияве дип атый. “Марат минем “племянница”ның ире”, - ди ул. 

Без ачыклык кертергә булдык.

Марат Шәйбаковка шалтыраткач, безгә аның хатыны җавап бирде.

“Әйе, Марат Хәмдүнә апаның кияве була инде. Хәзер аңлатып карыйм: минем әбием белән Хәмдүнә апаның әнисе бертуган. Без яхшы мөнәсәбәтләрдә”, - дип сөйләде Маратның хатыны Ләйсән.

Сүз уңаеннан, “Хәмдүнә Тимергалиева татар эстрадасында бренд, легенда, Марат исә әле танылып кына килә. Хәмдүнә апага ярдәм сорап мөрәҗәгать итәргә уйламыймы?” – дип сорадым.

Ләйсән: “Юк, Марат үз тырышлыгы белән сәхнәгә үрмәли. Хәмдүнә апа белән дә алай еш аралашабыз, димәс идем. Очрашканда, әлбәттә, сөйләшеп утыра алабыз”, - диде.

Марат Шәйбәков Уфада яши. Җырчы кыз һәм ул үстерә.