Җырчы, күп төрле проектлар алып барган, үз кибетләр челтәрен булдырган Гүзәлем изге Рамазан аенда нәшидләр җырлап, альбом яздырырга җыенуы турында хәбәр иткән.
«Матур нәшидләрдән торган альбом яздырырга теләк бар. Шуларның берсе – «Берәү генә». Гүзәлия көе, А.Минһаҗев сүзләре. Комментарийлар көтәм. Чыгарыйммы?» – дип киңәш сораган ул социаль челтәрдәге сәхифәсендә.
«Әлбәттә. Сез – үз эшегезнең остасы»;
«Бик матур. Аллаһы Тәгалә ярдәм итсен, башланган чорда куәт бирсен»;
«Иншаллаһ, искиткеч, яздырыгыз»;
«Сөбеханалла, күзләр тимәсен», – дип хуплаганнар аның бу ниятен виртуаль дуслары.
Нәшиднең эчтәлегенә ишарәләп, берәү: «Коръәндә «Ходай» сүзе юк, ул сүзне әйтеп җырламагыз. Аллаһны алай дип әйтү дөрес түгел», – дип шелтә белдергән.
Моңа җавап итеп, нәшиднең авторы Гүзәлия: «Бу – дога түгел, ә нәшид. Сөйләгәндә, җырлаганда «Ходай» дияргә ярый, догалар укыганда – ярамый. Моның турында бөтен җирдә язылган. Бик күп белгечләр, дин әһелләре белән киңәшләшеп язабыз мондый җырларны», – дип ачыклык керткән.
Видео: Гүзәлемнең шәхси аккаунтыннан
