Гүзәл Уразова Хәния Фәрхи белән соңгы сөйләшүе турында: «Күрешеп булмый инде, диде»

Җырчы Гүзәл Уразова белән Илдар Хәкимов Тәтешле аша узып барышлый мәрхүм җырчы Хәния Фәрхинең музеена кереп, аның яңа ачылган һәйкәлен күреп, сеңлесе Фирүзә Ибәтуллина белән күрешеп чыкканнар. Гүзәл хатирәләргә бирелгән, Хәния Фәрхи белән соңгы тапкыр сөйләшүләрен исенә төшергән. Бу хакта ул телеграм каналында яза. 

«Сонгы тапкыр Хәния апа миңа шалтыратканда: «Гүзәл, сәлам, хәлләрегез ничек, кайларда йөрисез? Эх, күрешергә иде, күрешеп булмый инде», – диде. «Хәния апа, нишләп алай дисең, күрешәбез әле, Аллаһы боерса», - дидем. 
«Мин бит сезне яратам, кунакка килегез әле, рәхәтләнеп сөйләшеп утырырбыз», - дип кунакка чакырды. 

Озак сөйләштек без аның белән. Күңелендә булганын сөйләде миңа. Хушлашып шалтыратуы булгандыр, күрәсең. Урының оҗмах түрәләрендә булсын, Хәния апа. Син мәңге безнең йөрәкләрдә!» – дип яза Гүзәл.