Гүзәл Уразова, акчалата бүләк тапшыру өчен, үзенең иҗатын яратучы комбайнчыны эзли

Гүзәл Уразова үзенең иҗатын үлеп яратучы комбайнчыны эзли. Җырчыга бик күңелле бер видео төшереп җибәргәннәр. Анда бер төркем комбайнчылар, Гүзәл Уразова җырларын тыңлап, эшкә чыгарга әзерләнә. Кайсы район, хуҗалык комбайнчылары икәнлеге билгеле түгел, әмма егетләрнең барысы да Гүзәл Уразова җырларына гашыйк. Араларыннан берсе, хәтта, җырчының концертлар афишасын комбайны тәрәзәсенә ябыштырып куйган..

«Эшкә әзерләнәбез! Менә иң алдынгы комбайнчы Марат Искәндәрович! Ул – Гүзәл Уразованың иң тугры тыңлаучысы», – дип сөйли видеоны төшерүче.

Видеоны социаль челтәрләргә куеп: «Бүген кәефемне күтәрделәр. Сабан туе уңаеннан, комбайнчы Марат абыйга үземнән махсус акчалата бүләк тапшырасым килә. Бу видеоның авторы минем белән элемтәгә чыкса иде», – дип, язган, телефон номерын да калдырган Гүзәл Уразова.