Иҗади гаилә Гөлсирин Абдуллина һәм Азат Абитовлар белән, фотосессиягә баргач, көтелмәгән күңелсез хәл килеп чыккан. Бу хакта Азат социаль челтәрдәге сәхифәсендә язган:
– Бүген фотосессия вакытында кызымны ялгыш машина эчендә бикләп калдырдым (бәләкәй кызлары Сылуга нибары 1 яшь – авт.). Ачкыч та, кызым да эчтә калды.
Гульсик – «истерика»да диярлек, кызларның кайсы интернеттан ярдәм эзли, кем догасын укый. Ә Сылу уйнап утыра, тәрәзә аркылы безгә сәламнәр җибәреп. Маладис та инде.
Узган елны шулай безнең машина бер бикләнеп калган иде Сабантуйда. Шунда Алмаз Гәрәев (Г.Камал театры артисты, ТНВ алып баручысы – авт.) җептән төенчек ясап, ачарга өйрәткән иде. Шуны искә төшереп, җеп табып, төенчек ясап, 2 минут эчендә ачтым! Бу – тәҗрибә дип аталадыр инде, менә бүген ул белем бик кирәк булды безгә. Рәхмәт сиңа, Алмаз дус!
Андый очракта, егетләр, иң мөһиме – «паниковать» итмәскә кирәк икән! Менә шундый тормыш мәктәбе!
Сүз уңаеннан, кем бикләнеп калган машинаны ача белми, «өйрәт» дип комментарий языгыз, сториста яздырып куям иртәгә. Кирәге чыгарга мөмкин, – дигән Азат.
«Минем дә шундый хәлгә калганым бар, «автовывоз» чакырткан идем», «Өйрәтегез әле», – дип әллә ничә кеше язган. Тик җырчының бу ниятен хупламаучылар да бар. «Караклар өчен дә яхшы видео булыр ул. Таралыр... Монда куйма лутше...», «Аннан теләсә кем ачамы машинаны?» – диешкәннәр.
«Нинди җавапсызлык. Ярар азагы яхшы беткән», – дип комментарий калдыручы да булган.
Фото: Азат Абитовның социаль челтәрдәге сәхифәсеннән