Грозный шәһәрендә яңа шартлау турында хәбәр иттеләр. Ул беспилотник җирле спецназ полкы казармасына һөҗүм иткән вакытта булган, дип фаразлана. Бу хакта «Лента.Ру» сайты яза.
Беспилотник һөҗүме вакытында беркем дә зыян күрмәгән. Инфраструктурага зыян килү турында да хәбәр ителми.
«База» Телеграм-каналы мәгълүматлары буенча, һөҗүм Россия Герое А.А. Кадыров исемендәге спецназ полициясе казармаларына булган булырга мөмкин. Шуннан соң шаһитлар көчле шартлау турында сөйләде.
Әлегә хакимиятләрдән бу хәлне раслый яки инкарь итә торган рәсми белдерүләр юк.
Интернетта таралган видео буенча, тавышына караганда, Грозныйда шартлау булганы аңлашыла. «Mash Gor» язмасында торак йорт подъездындагы иртәнге кадрлар күренә. Видеода гөрселдәгән тавыш ишетелә, һәм ут күренә.
Шулай ук, җирле аэропорт директорына сылтама белән, чыганак төбәктә төнге 1дән иртәнге 6га кадәр «Ковер» планы кертелүен хәбәр итте. Бу – беспилотник һөҗүме куркынычы аркасында эшләнгән.
29 октябрьдә беспилотник спецназ университеты территориясенә һөҗүм иткән иде. Буш торган бинаның түбәсенә ут капты, артык җитди зыян килми.
Ул вакытта Рамзан Кадыров төбәккә һөҗүм иткән дроннар санын әйтмәде. Әмма, Украина хәрбиләрен әсирлеккә алмаска, дигән боерык бирде, тик, соңрак, бу боерыкны гамәлдән чыгарды.
Чечняга беспилотник һөҗүме, махсус операция башланганнан бирле, Чечня хакимиятләре рәсми хәбәр иткән беренче очрак булды. Дроннар һөҗүме ихтималы турында хәбәрләр 2024 елның җәендә үк чыккан иде, әмма Чечня матбугаты бу мәгълүматларны кире какты.