Гомере буе битендә зур шеш белән яшәүче блогер Марат Юнысовны мини-трактор таптаткан

Блогер Марат Юнысовтан күңелсез яңалык ишеттек. Ул Сарман районы Дүсем авылында яши. Язгы бакча эшләрен башкарганда ялгыш мини-трактордан егылып, тәгәрмәч астында калган. Табибларга мөрәҗәгать иткәч, уң як кабыргалары сынганы ачыкланган. Бу хакта «Шәһри Чаллы» хәбәр итә.

«Рентген, КТ ясадылар, эчке органнарга зыян тимәгән, диделәр. Хастаханәдә нинди дәвалау булачагын сорадым. Авыртуны баса торган уколлар гына, диделәр. Гипс та юк, башка төр дәвалау да. Шуңа гариза язып, авылга кайтып киттем. Сулаганда авырта, шулай да акрынлап сулыйм, Аллаһка шөкер, ашый алам», – дип сөйләгән Марат.