Мәскәү өлкәсенең Гражданнарны яклау баш идарәсе урманда адашкан гөмбәчеләргә өйләренә кайтырга ярдәм итәчәк киңәшләр әзерләгән. Бу хакта РИА Новости хәбәр итә.
«Әгәр ярдәм чакыру мөмкинлеге булмаса, өйгә юлны үзегез табарга булсагыз, линияле ориентирлар – электр тапшыру линияләре, газүткәргечләр, киң урман ызаны, инеш агымы буйлап аска таба барыгыз. Чокырларны урап узыгыз», – диелә хәбәрдә.
Һәр 15-20 минут саен сигнал бирергә – сызгырырга яки таяк белән агачка сугарга киңәш ителә.
«Әгәр сезне эзләүләрен беләсез икән, учак ягарга мөмкин – төтен коткаручыларга ярдәм итәчәк», – дип билгеләделәр ведомствода.
Коткаручылар гөмбәчеләргә, урманга барганда, якыннарына кая баруларын һәм кайчан кайтырга планлаштыруларын әйтеп китәргә киңәш итә.
Шулай ук телефонга тулысынча заряд җыйдырырга, мөмкин булса пауэрбанк алырга, ачык төстәге кием кияргә (киемдә яктылык кайтаргыч элементлар булса тагын да яхшырак) кирәк. Синоптиклар яңгыр, яшен яки томан фаразлаган очракта гөмбәгә баруны кичектереп тору яхшырак. Шулай ук урманга ялгыз йөрмәү мөһим.