Эченә гөмбә һәм тавык ите салып пешерелгән бу пирогның камыры авызда эреп тора. Аның рецепты белән «Атна вакыйгалары» газетасы уртаклаша.
Камыр өчен: 100 г ак май, 100 г кибет каймагы, ярты чәй кашыгы тоз, ярты аш кашыгы шикәр комы, 250 г он, 10 г камыр көпшәкләндергеч (разрыхлитель).
Ак майны эретеп суытырга, шуңа бүлмә температурасындагы каймак, тоз, шикәр, он һәм камыр көпшәкләндергеч салып, җиңел генә камыр басарга. Аннары пакетка салып, 15 минутка туңдыргычка куярга.
Эчлек өчен: 1-2 башлы суган, 250 г шампиньон гөмбәсе, 250 г тавык ите, 1-2 аш кашыгы кибет каймагы, 100 г сыр, тәменчә тоз һәм борыч.
Эчлек өчен туралган суган, шампиньон гөмбәсен, тавык итен көнбагыш мае салып табада пешерергә. Әзер булгач, кибет каймагы, тоз һәм борыч салып бутарга да, плитәдән алып куярга.
Суынган камырны зуррак итеп җәяргә кирәк – аны табага куйгач, кырыйлары пирог өстен капларга җитәрлек булсын.
Табаны майларга, шуңа җәелгән камырны куярга, өстенә суынган эчлекне салырга һәм кыргычта уылган сыр сибәргә. Камырның кырыйларын тарткалап-бөреп, пирогның өстен тулысынча капларга. Аннары туглаган йомырка сыларга. Шулай ук кунжут сибеп һ.б. бизәргә була.
Пирогны 200 градуска кадәр кызган газ мичендә 20-25 минут пешерергә.