Гөлүсә Шаһбан социаль челтәрләр турында: «Бөтен кешенең тәгәрәп бара төсле тормыш арбасы»

Шагыйрә Гөлүсә Шаһбан бүгенге заманда кеше тормышында телефон, социаль челтәрләр тоткан урын турында уйланган һәм шул турыда виртуаль дуслары белән уртаклашкан.

«Кызым белән сөйләшеп утырабыз... Икебезнең дә кулда – телефон. Өйдә эш көтә...

– Кызым, элек заманда телефонсыз ничек яшәгәннәр, күз алдыңа китерәсеңме?!

– Китерәм, әни.

– Китермисең шул, кызым, элек заманда кеше ике як күршесеннән генә көнләшеп яшәгән, ә хәзер бөтен дөньядан көнләшеп яшиләр...

Бөтен кешенең «тәгәрәп бара» төсле тормыш арбасы бу социаль челтәрләрне күзәтсәң. Иң бәхетле кеше кем ул? Үз тормышын гына белеп, күреп яшәүче.

«Любовь и голуби». 101 тапкыр булса да, тагын бер карагыз әле шул фильмны», – дип тәкъдим иткән Гөлүсә ханым.

Шагыйрәнең виртуаль дусларының берсе бүгенге заманны чагылдырырга шигырь юллары да язып калдырган:

«Кызык заманда яшибез:

Бар нәрсә телефонда.

Барасы юк, йөрисе юк,

Телефон булсын кулда.

Буш телефоннан файда юк,

Булгач, акчалы булсын.

ВПНлы, «безлимитный»

Интернет эшләп торсын!

Мәхәббәт тә хәзер җиңел –

Телефон аша гына.

Очрашулары да аның

Видеоформат кына.

Гашыйк булып Интернетта,

Төн буе язышасың.

Кызыкмы бу, кызганычмы?

Һәркем үзенчә аңласын...»

Фото: Гөлүсә Шаһбанның социаль челтәрдәге сәхифәсеннән