Яшь җырчы Казан дәүләт мәдәният институтының магистратурасын кызыл дипломга тәмамлаган.
«Аллага шөкер! Мине котласагыз була! Югары белем дипломы алдым.
Бик зур рәхмәтем һәрвакыт ярдәм кулы сузуы, аңлавы, киңәшләре, дәресләре өчен Винера апа Ганиеевага! Һәм барлык укытучыларыма зур рәхмәт!» – дип куанычы белән уртаклашкан Гөлсирин социаль челтәрдәге сәхифәсендә.
Гөлсирин диплом алырга гаиләсе белән – ире Азат Абитов һәм нәни кызы Сылу белән бергә барганнар. Ләкин нәкъ менә Гөлсирингә диплом биргән тантаналы мизгелләрне Азат белән Сылу күрми калганнар. Чөнки бу вакытта аулаграк җирдә бәләкәч йоклый торган булган.
Азат Абитов: «Кереп өлгермәдек, йокладык», – дигән.
Гөлсиринне шушы шатлыгы белән бик күпләр котлаган. «Уңышлы диплом булсын. Халык артисты дигән исемгә китереп җиткезсен!», «Уй-хыялларың тормышка ашсын», «Куанычын күрергә язсын», «Игелекле дипломнар булсын. Афәрин, Гөлсирин, барысына да өлгерәсең», «Котлыйбыз. Яратабыз. Азат белән дуэтларыгызны көтеп калабыз», – дип җылы сүзләр ирештергәннәр яшь җырчыга, яшь әнигә виртуаль дуслары.
Бу теләкләргә «Интертат» редакциясе дә ихластан кушыла.
