Чаллыда «Мунча ташы» миниатюралар театрының гастрольләре булды. Программада «көн кадагына суга торган» юмор да, сатира да, моңлы җырлар да, биюләр дә бар.
Әлеге тамашада Рәшит Ваһапов фондының талантлы яшь җырчылары Гөлсирин Абдуллина белән Азат Абитов та чыгыш ясаган. Тамашачы җырчыларны кат-кат сәхнәгә чакырып алкышлаган. Бу хакта «Шәһри Чаллы» газетасы хәбәр итә.
Гөлсирин Абдуллина белән Азат Абитов әллә «Мунча ташы» театрында эшли башлаганмы? «Шәһри Чаллы» шул сорау белән җырчыларның үзләренә мөрәҗәгать иткән.
«Гамил абый Әсхәдулла республиканың Чаллы, Казан кебек зур шәһәрләрендәге концертларында чыгыш ясарга чакырган иде. Без, рәхмәтле булып, ризалаштык. Чаллы тамашачысы да безне сагынган икән», – дип җавап биргән Гөлсирин «Шәһри Чаллы» газетасына.
