«Туган тел» телеканалындагы «Сер итеп кенә» тапшыруы алып баручысы Роза Хәйруллина җырчы Гөлсирин Абдуллина белән Азат Абитовтан кечкенә кызлары Сылу турында сорашкан.
Өчәүләп килеп җиткәнсез Уфа хәтле Уфага! Бала белән йөрүнең авырлыклары бардыр, Гөлсирин, әйеме?
Гөлсирин:
Элегрәк җиңел иде. Хәзер менә үсә башлагач, баланы тыеп булмый. Аның да характеры бар. Ләкин иң мөһиме – бала безнең белән. Борчыласы юк. Кем, кайда, ничек карый, ашаганмы ул, елыймы, юкмы… Без балабызны үзебез карыйбыз, Аллаһка шөкер. Болай күңел күпкә тынычрак..
Сылу кайсыгызга күбрәк охшаган холкы-гадәтләре буенча?
Азат:
Холкы белән күбрәк миңадыр инде.
Гөлсирин:
Әйе, Сылу да кире.
Роза Хәйруллина:
Азат әйтә, «мин кызсам, озак суынам», ди. Бу чыннан да шулаймы?
Гөлсирин:
Әйе, анысы бар, икебез дә Әтәч елында туганбыз. Бик кызу кешеләр без.
Азат:
Әмма Сылу бик тиз «суына». Ул яктан әнисенә охшаган.