Гөлназ Сәфәровадан «кияү пәрәмәче» рецепты

Танылган алып баручы Гөлназ Сәфәрова социаль челтәрдәге битендә «кияү пәрәмәче»нең рецепты белән уртаклашкан.

«Ни өчен кияү пәрәмәче? Бу – мин уйлап тапкан рецепт түгел. Әбиләр бу ризыкны бик яраткан кияүләренә пешереп ашаткан. Кияү пәрәмәче бик сирәк пешерелә торган затлык ризык булып саналган», – дип язган алып баручы мондый пәрәмәчне беренче күрүчеләргә җавап итеп.

Камыр өчен 2 йомырка, 1 стакан тулыр-тулмас җылы су, 1 аш кашыгы сыек май, 1 бал кашыгы тулыр-тулмас тоз, чама белән он.

Камырны йомшак итеп басарга. Вак җәймәләр ясарга һәм эчлек салганчы ук кырыйларын бөгеп «кәрзин» ясарга кирәк. Аннары аларны туңдыргычта яки урамда катырырга кирәк.

Шул арада эчлек ясарга була. Табага бераз үсемлек мае, фарш, суган, тоз, борыч салырга һәм пешерергә. Шулпа өстәсәгез, тагын да тәмлерәк булачак.

Табада май кыздырырга, ләкин май пәрәмәч күмелерлек булырга тиеш түгел. «Кәрзин»нәрнең башта эчке ягын, аннан тышкы ягын кыздырырга. Тышкы ягын кыздырганда әзер эчлекне салырга.

Әзер пәрәмәчләрнең артык мае саркысын өчен салфеткага куярга була.