Иҗади гаилә Гөлназ һәм Илсур Шәрипҗановлар «ТНВ» телеканалындагы «Сөйләшергә вакыт» тапшыруында кунак булган. Алар алып баручы Лилия Кадыйрова белән ретро-җырлар турында да сөйләшкән.
Лилия Кадыйрова: Элек сез үзенчәлекле, үзегезнең җырларны башкара идегез. Хәзер сезнең репертуарда ретро-җырларга өстенлек бирелә, яңа сулыш биргән җырларыгыз күп. Бу нәрсә белән бәйле? Алар халыкка тизрәк «кереп китәме»?
Гөлназ: Әйе, анысы да бар. Тамашачыга таныш җыр тизрәк популярлаша. Мисал өчен, Гайфулла Авзаловның «Әллә син, әллә мин» җыры. Элек халык телендә булган җырны популярлаштыру, халыкка тәкъдим итү күпкә җиңелрәк.
Илсур: Әгәр авторлар һәм җырны элеккеге башкаручылары белән килешеп, бер фикергә килеп башкарсаң – начар түгел. Башта популяр артистлар рөхсәт алмыйча җырлыйлар да, гауга китә. Әллә тамашачы өчен генә уйныйлар, әллә чынлап та шулай... Бу тенденция бездә генә түгел.
Гөлназ: Бүгенге көндә Россия артистлары да шулай эшли, чит ил эстрадасында да, татар эстрадасы «акулаларында» да шул ук әйбер. Әле ул бәясеннән дә тора. Гайфулла Авзаловның җыры безгә бушка эләкте, теләсә кайсы рето-җыр бушлай. Аның өчен зур акча кирәкми. Ә композиторлар җырга 50 меңнән сумнан башлап бәя куя, аңа кимендә 50 мең сумга аранжировка ясарга, аны кимендә дуэтка яздыру 20 мең тора. Шушы бәяне 2-3кә тапкырлап халыкка чыгарырга.
Лилия Кадыйрова: Димәк, артистларга ретро-җыр күбрәк файда китерә? Шуңа татар эстрадасы аларга өстенлек бирә башлаган...
Гөлназ: Шулайдыр. Аларны популярлаштыру да җиңелрәк, һәм халык та отып ала, сиңа кушылып җырлый.
Илсур: Яңа җырны халыкның ничек кабул итәчәген белмисең – хит буламы, «ата»мы. Чыгымнарны каплармы? Кызганычка, җыр иҗат итү – ул текст авторы, композитор һәм башкаручы өчен дә бизнес. Акчага килеп терәлә. Шуңа, яңа җыр яздырганчы, 7 кат үлчәп 7 кат кисәсең...
