Җырчы социаль челтәрдә туя агачы (бәлки, куагы дөресрәктер) үстерү серләре белән уртаклашкан.
Гөлназ үзе әлеге мәңге яшел ылыслы үсемлеккә гашыйк икән. Бакчасында ире Вәли Фазлыйәхмәтов белән бергә-бергә үстерәләр.
«Яратам туяларны. Бер ел эчендә шулхәтле зур үсте. Бик тиз үсәләр. Аларның иң яратканы – «душ».
Мин 13-14 ел элек Швейцариягә бәйгегә баргач, андагы матурлыкны күреп хисләнеп кайттым. Андагы туялар мине «котыртты»... Туяларны авыш-тәвеш китереп, нәрсә генә кыландырмаганнар иде: койма дисеңме, төрле-төрле фигуралармы... Казанга кайтуга иң беренче чиратта туялар сатып алдым, үзебездә дә кечкенә Швейцария ясау өчен», – дип язган Гөлназ.
«Туяларны ничек тәрбиялисез, күрсәтегез әле», – дип кызыксынучыларга ул: «Кечкенәләрен утыртыгыз. Зурларын күчереп утырту да кыен түгел, чөнки тамырлары кечкенә. Башларын киссәгез, алар куе булып үсәчәкләр. Әйткәнемчә, «душ», өстән су сиптергәнне яраталар», – дип җавап биргән.
