Инде берничә ел Америкада яшәүче татар җырчысы Гөлназ Батталова яңа туган улының исемен атады.
Җырчының 22 июльдә икенча тапкыр әни булуы турында хәбәр иткән идек. Артист Лос-Анджелеста малай тапты. Сабыйга 1 ай тулу уңаеннан, Гөлназ язылучыларына улының исемен әйтергә булган.
«Улым, без сине чиксез яратабыз! Таныш булыгыз, безнең нәни принц – Николас Александр», – дип язды артистка социаль челтәрләрдә.
Гөлназ Батталова – татар җырчысы, актриса, «Первый» каналдагы «Голос» һәм «ТНТ» телеканалындагы «Золото Геленджика» шоуларында катнашып та танылды. Соңгысында җырчы 1 килограмм алтын откан иде.
Берничә ел элек җырчы Америкага күченеп китеп, америкалы Алекс Наберга кияүгә чыкты. Пар, шулай ук, яшь ярымлык кызлары Эмманы тәрбияли.
«Кызлы һәм уллы булу – минем иң зур хыялым иде. Рәхмәт, Ходаем», – дип тә яза Гөлназ үзенең сәхифәсендә.
