Яшь җырчы, яшь әни Гөлназ виртуаль дусларының сорауларына җавап биргән. Аеруча игътибарга лаек булганнарын тәкъдим итәбез.
«Кияүгә чыкканыгызга үкенмисезме? Кияүгә чыккач, мәшәкатьләр башлана бит», – дип кызыксынган берәү. Әлеге сорауга Гөлназ: «Юк, әлбәттә», – дип җавап биргән.
Шушы ук темага икенче кеше: «Кияүгә яратып чыктыгызмы?» – дип сораган. Гөлназ моңа кызып китеп: «Әйтегез әле зинһар, сез табибта соңгы тапкыр кайчан күрендегез?» – дип дорфа гына җаваплаган.
«Тавышыгыз калын. Әз генә йомшартырга кирәк. Каты итеп сөйләшмәгез, килешми сезгә», – дип тәкъдим итүче дә табылган. Бу да Гөлназның ачуын китергән, күрәсең, ул: «Хәзер менә, сезгә ошар өчен тавыш үзгәртеп йөрим», – дигән. (Нәрсә-нәрсә, Гөлназның тавышы искиткеч моңлы инде анысы, үзгәртә генә күрмәсен дә, күзләр генә тимәсен.)
«Сезнең яраткан татар җырчыларыгыз кемнәр?» – дип тә сораганнар. Бактың исә, Гөлназның яраткан татар җырчылары Азат һәм Алинә Кәримовлар икән («Яңа гасыр» телерадиокомпаниясендә «Җырлыйк әле» тапшыруын алып баручылар). Ул әлеге җырчы гаиләнең шәхси аккаунтына сылтама калдырган.
