Җырчы социаль челтәрдәге сәхифәсендә виртуаль дусларының иң четерекле сорауларына җавап биргән.
«Онлайн рәвештә күпме акча эшләдең һәм аны нәрсәгә тоттың?» дигән сорауга Гөлназ: «Соңгы ике елны исәпкә алсак, унике миллион. Ул акчага фатир һәм машина алдык», – дип җавап биргән. Гөлназ, сәхнәдән тыш, ире Вилли (Вилдан Шәмсетдинов) белән бергә челтәрле бизнеста да эшли, эшмәкәрлек белән дә шөгыльләнә дип беләбез.
Кызыгыз артист булачакмы дигән сорауга Гөлназ: «Белмим дә инде, тавышы искиткеч матур, сопрано булса, опера җырчысы булса гына», – дип көлгән.
Татарстанда һәм Башкортсанда матди яктан иң югары бәяләнә торган артист турында сорау булгач, Гөлназ шикләнеп кенә; «Тәгаен әйтә алмыйм, мөгаен Салават Фәтхетдиновтыр. Мин шулай уйлыйм», – дигән.
«Кем әйбәтрәк җырлый: Ришат Төхвәтуллинмы, әллә Элвин Греймы?» – дигән сорауга исә Гөлназ, икеләнеп тә тормыйча: «Илһам Шакиров!» – дип җавап биргән.
