Габдулла Тукай исемендәге Әтнә татар дәүләт драма театры артисты Рәзинә Заһидуллинага Сабан туе мәйданында «Татарстанның атказанган артисты» исеме бирелгән. Бу хакта журналист, шагыйрә Гөлинә Шәйхи хәбәр итә.
«Чәчләрдән йолкыша-йолкыша сугышкан кешең белән шатлыгыңны да, кайгыңны да бүлеш, имеш. Әнә шул холык кемнең кем икәнен күрсәтте дә, вакыт яхшыларын аралап калдырды. Бүген исә синең шатлык – минем шатлык. Сиңа исем бирергә дип указ чыккан көнне шатлыктан елаган күк халәт бүген. Лаекларның лаек булырга хакы бар.
Әле бер генә артистка да Сабантуйда, кыр батырлары белән бергә бастырып, «Татарстанның атказанган артисты» дигән исем биргәннәре юк иде. Син – беренче. Моннан соң гел Сабантуйда бирә торган булырлар әле. Дөньясы шаккатып карап ятсын», – дигән ул.
Рәзинә Заһидуллина үзе дә: «Атказанган дигән мактаулы исемгә лаек дип тапканыгыз өчен рәхмәт», – дип язып куйган.
