Җырчы Гөлдания Хәйруллина социаль челтәрләрдә бик еш кына яшь чакларын искә алып, хатирәләрен барлый. Чаллы татар дәүләт драма театры артисты Булат Сәләхов белән очрашкач, ул үзләренең концертлар белән йөри башлаган чорларын искә алган.
«Сольный концертлар куя башлаганда беренче алып баручым - юмор остасы Булат Сәләхов булды.
Ул вакытта машина да юк. Рөстәмнең «Чезет» дигән мотоциклы гына бар. Аппаратура да юк дәрәҗәсендә: бер чемодан кебек кенә колонка, көчәйткеч, баян өчен микрофон куярга стойка гына.
Ә менә тамашачыларга килгәндә, иртән афиша элсәк, кич клубта аншлаг була иде. Һәр җәйдә Илеш белән Бакалы районында йөргәннәр аеруча истә калган. Шунда бер автобус шоферы белән таныштык. Ул безне эштән соң көн дә авылларга концертка йөртте. Ишек төбендә билетны да тикшереп торды, бер кеше дә билетсыз керми иде.
Бер авылдан икенче авылга кат-кат, ат арбаларына утырып киләләр иде. Бер авылда койма такталарын кубарып алып сугышканнары да истә калган әле», – дип язган ул артист белән төшкән фотосын урнаштырып.
Булат Сәләхов белән Гөлдания Хәйруллина турында виртуаль дуслары: «Чаллы сандугачлары», – дип язганнар. Булат Сәләховның да әлеге фотоны күреп күңеле булган. «Рәхмәт, Гөлдания дустым. Зурладың. Тагын йөрисе килә шул якларда... Рөстәм беләән Шәфәгать кенә юк. Исән-сау булыйк, кадерле хезмәттәшем», – дип комментарий язган ул.