Үги ата биш һәм дүрт яшьлек ике баласын пычак белән яралаган
23 яшьлек ир бергә яши торган хатыныннан үч алу өчен, балаларны имгәткән.
Волгоград өлкәсендә яшәүче ир-ат бергә яши торган хатынының ике нәни баласын пычак белән яралаган. Россия Тикшерү комитетының Волгоград өлкәсе буенча Тикшерү идарәсе җинаять эше ачкан. Бу турыда РИА Новости хәбәр итте.
Ведомство мәгълүматы буенча, Волгоград өлкәсенең Ленин районында яшәүче 23 яшьлек ир-ат бергә яши торган хатыны белән талаша. Шуннан соң алар икесе хатынның әти-әнисе янына китә, хатынның 5 яшьлек кызы һәм 4 яшьлек улы өйдә калып тора.
«Бераздан ир өйгә кайта һәм бөтен ачуын балалардан алмакчы була. Ул пычак ала һәм үги кызының күкрәк читлегенә һәм иңбашына ике тапкыр пычак белән суга, аның нәни энесенең кул бармагын кисә», диелә Тикшерү комитеты хәбәрендә.
Җинаятьтә шикләнелүче ир-ат тоткарланган, аңа карата җинаять эше ачылган. Ведомство хәбәр иткәнчә, балалар хастаханәдә дәвалана, аларның сәламәтлегенә куркыныч янамый.