Әгерҗе районында яшәүче ир-ат элеккеге хатынын үтергәнче кыйнаган
32 яшьлек ир-атны 6,5 елга ирегеннән мәхрүм иттеләр.
Татарстанның Әгерҗе районында яшәүче 32 яшьлек ир-атка карата хөкем карары чыгардылар. Аны алдан уйлап сәламәтлеккә авыр зыян китерүдә һәм саксызлык аркасында үтерүдә гаепле дип таптылар. Бу турыда Татарстан прокуратурасына сылтама белән «Татарстан 24» каналы хәбәр итте.
Суд ачыклаганча, быел июнь аенда бу ир-ат исерек була. Ул элеккеге хатыны белән талаша һәм аны вәхшиләрчә кыйный. Шуннан соң ир-ат бер танышы белән бергәләп имгәнгән хатынны өенә илтеп куя. Хатын шунда үлә.
«Гаепләнүче үз гаебен тулысынча таныды. Суд аны 6,5 елга ирегеннән мәхрүм итте һәм каты режимлы колониягә озату карары чыгарды», диелә ведомство хәбәрендә.