Казандагы торак комплексларның берсендәге лифтта гаилә низагын видеокүзәтү камерасы төшереп торган. Бу кадрларны «Татарстан 24» телеканалы күрсәтте.
Язмада ир-ат лифт кабинасыннан әйберләр чыгарып ата, шул чакта нәни кызын аяктан ега. Бала коридордагы таш идәнгә башы белән бәрелә. Ләкин гаилә башлыгы тынычланмый, баласының елавына да игътибар итми.
Күршеләре сүзләренчә, видеодагы кебек низаг беренче тапкыр гына түгел. Фатир ишеге артында гел кычкырыш, бала елаган тавыш ишетелә. Җәнҗал фатирдан тышка чыгу очрагы – беренче тапкыр, ди күршеләр.
Гаилә башлыгы сүзләренчә, барысына да хәмер гаепле. «Көнкүреш талашы, коляскага да бераз зыян килде», – ди бу ир-ат.
Социаль челтәрләрдә таралган видео турында күрше-күлән гапләшә. Аеруча, балалары булган кешеләр. Алар ата-ананың тәртибен тәнкыйтьли, тиешле органнарны игътибар итәргә чакыра. Әти кеше үзе исә» берни булмаган» дип саный.
«Гаиләдә мондый очрак булганда, балада ата һәм ананың негатив комплексы формалашкан була», – ди клиник психолог Марина Гаралева.
Телеканал белешмәсе буенча, әлеге фактны хокук саклау органнары тикшерә, җинаять эше кузгату турында мәсьәлә хәл ителә.