Азалия һәм Айдар Юнысовлар гаиләсенә авыр кайгы килгән. Гармунчының хәләл җефетенең әти-әнисе юл һәлакәтендә вафат булган. Бу турыда социаль челтәрләрдә хәбәр ителә.
«Кояш шикелле изге кешеләр иде. Рәхмәтем чиксез сезгә барысы өчен дә! Кызыгызны җил, яңгыр тидерми саклармын! Урыннарыгыз оҗмах түрләрендә иң бөек урыннарда булсын», – дип язган музыкант.
«Минем якыннарым. Ышанмыйм», – дип язган бер мизгелдә әти-әнисен югалткан Азалия.
Зур югалту кичергән гаиләнең якыннары, дуслары, танышлары кайгы уртаклашу белдерә. «Интертат» редакциясе дә яшь гаиләнең авыр кайгысын уртаклаша, күркәм сабырлык тели.
