Галимнәр шикәр диабетыннан саклануның иң гади ысулын атады

Бик кыска, әмма интенсив тренировкалар икенче типтагы шикәр авыруы куркынычын киметә.

Әлеге күнегүләрне атнага нибары ике минут кына эшләү дә җитә. Шотландиянең Абердин университеты галимнәре шундый нәтиҗәгә килгән дип яза “Российская газета”.

Галимнәр фикеренчә, һәрберсе берәр минутлык интенсив тренировкаларны атнага ике тапкыр эшләү икенче типтагы шикәр авыруы куркынычын киметә. Галимнәр әлеге кыска, әмма киеренке тренировкаларның нәтиҗәсен, көндәлек 30 минутлык уртача физик активлык белән чагыштыра.

Тикшерү барышында диабет куркынычы янаган, артык авырлыгы булган кешеләрнең мәгълүматлары анализланган. Алар сигез атна дәвамында велотренажерда күнекмәләр эшләгән. Катнашучылар алты секундлык ун интенсив тренировка ясаган. Йөрәк-кан тамыры системасын һәм организмның кандагы шикәрне чистарту сәләтен яхшырту өчен бу җитәрлек булган.